Kombëtarja shqiptare luajti mbrëmjen e sotme përballë Azerbajxhanit në provën e dytë para nisjes së EURO 2024. Sfida e zhvilluar në “Haladás Sportkomplexum” të Hungarisë, përfundoi me fitoren 3-1 të kuqezinjve.
Pas kësaj sfide ka folur kapiteni, Berat Gjimshiti.
“Sigurisht që kam ardh me vonesë sepse kemi mbaruar edhe kampionatin në Itali pak më vonë. Por kam gjetur një ekip që është shumë gati dhe që është ushtruar shumë. U duk edhe në fushë në këto 2 ndeshje. Po përgatitemi shumë për Italinë dhe jemi të gjithë gati”, u shpreh fillimisht Gjimshiti.
Ke problem që në Kombëtare luan me 4 mbrojtës?
“Jo nuk është, sepse edhe kualifikueset i kemi luajtur kështu. Nuk është problem për mua”.
Ndaj Italisë mund të luani përballë shokut tuaj te Atalanta, Scamacca. Keni diskutuar me njëri-tjetrin?
“Nuk kemi diskutuar shumë me njëri-tjetrin. Shokët e skuadrës simë më kanë thënë që t’i bëj ndërhyrje të ashpra dhe mos ta lë ta shënojë. S’do të jetë Gjimshiti kundër Scamaccas, por Shqipëria kundër Italisë. Do të sulmojnë të gjithë bashkë dhe jemi gati”.
Sa pozitive është që shumë lojtarë luajnë në Serie A?
“Besoj që është pozitive. Nuk është e lehtë të përgatisësh një ndeshje dhe si kjo e sotmja. Kemi lojtarë që kanë vite në Serie A dhe kjo pritet të jetë një ndihmë. Është diçka pozitive për ne. Shpresoj t’i bëjmë shqiptarët krenarë”.
