Kosova do të luajë mbrëmjen e kësaj të premte sfidën e parë të Nations League përballë Rumanisë. Ndeshja që do të zhvillohet në stadiumin “Fadil Vokrri” të Prishtinës, do të startojë në orën 20:45.
Ndërsa në prag të kësaj sfide, ka folur dhe trajneri i “Dardanëve”, Franco Foda, i cili beson te rezultati pozitiv.
“Deri tani kemi pasur disa ndeshje jashtë vendit. Tani kemi ndeshjen e parë në shtëpi. Këto ditë kemi ushtruar shumë mirë me ekipin së bashku dhe jemi të gatshëm për ndeshjene nesërme kundër Rumanisë. Sikur për ekipin ashtu edhe për mua si trajner është hera e parë që luajmë në fushën e re dhe kemi tifozët pas nesh, andaj dëshirojmë të japim energji të re në këtë ndeshje.
“Siç e kam potencuar edhe më herët mqësoret kanë përfunduar dhe nuk kemi kohë për të provuar. Kemi më shumë alternativa se në ndeshjet e kaluara. Kemi Fisnik Asllanin e Elvis Rexhbeçajn dhe të tjerët. Elvisi është mesfushor që mund ta përdorim në pozita të ndryshme, është lider, agresiv. Me përvojën tek Augsburgu, do t’i sjellë shumë të mira ekipit. Po punojmë intensivisht për t’i fituar ndeshjet e Ligës së Kombeve.
“Krasniqi dhe Rrahmani kanë luajtur në Rumani dhe tani kanë bërë hapin e radhës duke kaluar te Sparta Praga. Ne në ekip i kemi diskutuar të gjitha detajet për lojën e rumunëve. I dimë thuajse gjitha detajet se si luan Rumania në sulm e në mbrojtje, prandaj besojmë në fitore”, ishin fjalët e trajnerit të Kosovës, Franco Foda në prag të sfidës ndaj Rumanisë në Nations League.
