Kombëtarja shqiptare do të marrë pjesë për herë të dytë në finalet e një Kampionati Europian. Për herë të parë përjetoi emocionet e një kompeticioni të tillë në vitin 2016, kur Gianni De Biasi do të drejtonte kuqezinjtë në Euro 2016 në Francë.
Italianit nuk i “ndahet” shpirti nga Kombëtarja dhe ka folur për “Gazzetta dello Sport” para duelit me Italinë. Sfidë kjo që do të luhet ditën e shtunë në orën 21:00 në “Signal Iduna Park” në Dortmund.
De Biassi paralajmëron italianët dhe thekson se Shqipëria nuk duhet nënvlerësuar. Pavarësisht gjithçkaje sërish shikon si favorite Italinë, por nga ana tjetër mendon se tifozët kuqezi do të jenë vendimtarë në këtë përballje me mbështetjen e tyre ndaj Kombëtares së Sylvinhos.
“De Biassi, si ish-trajner i Shqipërisë, a e ndoqët atë në miqësoren kundër Azerbajxhanit, tjetër ekip që ju e keni drejtuar së fundi? Po, Shqipëria fitoi 3-1, por ishte një ndeshje e luftuar. Mund të them se Shqipëria më pëlqeu për mënyrën si dilte nga prapa me top.
Italia, çfarë duhet të ketë kujdes nga Shqipëria për ndeshjen e së shtunës në Gjermani? Në mesfushë, Asllani dhe Ramadani dinë të filtrojnë dhe të rinisin aksionin. Sulmuesi kryesor, Broja, është i fortë fizikisht dhe mund të shfrytëzojë çdo rast minimal. Asani dhe Seferi i japin fantazi skuadrës shqiptare nga krahët. Dhe kujdes mga tifozët e tyre, pasi të shtunën në Dortmund do të jenë me mijëra shqiptarë entuziastë.
Cilat janë pikat e dobëta të kësaj skuadre? Nuk e di çfarë taktike do të zgjedhë trajneri Sylvinho, nëse do ta sulmojë Italinë, apo do ta presë. Shqipëria e tij bën një lojë propozitive. Sylvinho ka pasur maestro të mëdhenj në karrierë, për shembull, ka punuar me Roberto Mancinin. Shqipëria është një kundërshtar që nuk duhet nënvlerësuar dhe këtë Spaleti e di mirë. Italia është favorite”, ka përfunduar 67-vjeçari.
