Komentatori i njohur kosovar, Arben Berisha i cili dhuroi emocione për shikuesit të sportit në Kosovë për vite me radhë ishte i ftuar në “Blic Interview”, aty ku mes shumë temave foli edhe për pjesëmarrjen e Shqipërisë në Euro 2024.
Ai gjithashti foli edhe për gjestin e Mirlind Dakut, i cili u dënua nga UEFA.
“Mendoj që gjesti Mirlind Dakut ka ndodhur për shkak se e ka mbërthyer pak atmosfera. Ai hyri në lojë dhe ishte ndeshja e parë që u aktivizua, atmosfera të mbërthenë, jo vetëm kur je tifoz e futbollist, por edhe kur je komentator. Në fillimet e secilit lojtar situata të tilla edhe mund të ndodhin, por natyrisht çka ka qenë e patolerueshme gjuha e përdorur, nuk i përket një futbollisti ta bëjë një gjë të tillë, sepse në fund të fundit, ai e mori dënimin, ai ia bëri sherrin vetes, një lojtar që do të mund të luante edhe kundër Spanjës, kush e di ndoshta edhe do të shënonte.
“Dakun e ka mposhtur atmosfera, kur je në një prani të tillë të publikut, kur publiku kërkon shumë, është i nxehur edhe në aspektin nacionalist, besoj që futbollistët duhet paraprakisht të udhëzohen nga stafi përgjegjës i kombëtares që të udhëzohen të mos bijnë në situata të tilla, sepse ato mund të ndodhin. Aq më tepër kjo gjë ndodhi në një ndeshje Shqipëri – Kroaci, kur të dyja palët e kishin të njëjtin armik, pra kishin problemin me Serbinë. Unë mendoj se Daku nuk e ka menduar, këtë gjë, por ai ka rënë në grackë dhe e ka mbërthyer atmosfera”, tha Berisha
