Ballkani do të zbresë sot në fushë për tu përballur ndaj ekipit të Viktoria Plzen. Ndeshja e vlefshme për raundin e 5-të të fazës së grupeve të Conference League do të zhvillohet në stadiumin “Air Albania” duke nisur nga ora 18:45.
Një ndeshje shumë e rëndësishme për ekipin nga Theranda, të cilët renditen në vendin e 3-të me 4 pikë po aq sa Astana e vendit të dytë. Me një fitore përballë çekëve, të besuarit e Ilir Dajës do të ishin shumë pranë kualifikimit për në fazën tjetër.
Optimizmi nuk mungon tek kampionët e Kosovës, madje Ilir Daja është shprehur dje që s’ka pse të jetë i kënaqur me 1 pikë dhe do të bëjnë më të mirën e mundshme.
Kujtojmë që Ballkani është vendosur në Tiranë që të martën e 28 nëntorit dhe është stërvitur në fushat stërvitore të ekipit të Dinamos.
