‘Tifozat e Kuq e Zi’ pritet të jenë një forcë e shtuar e Kombëtares së Shqipërisë në ‘Euro 2024’.
Kuqezinjët e fillojnë pas pak ditëve misionin në Kampionatin Evropian, kurse tifozët kanë qenë gjithmonë pikë e madhe motivuese.
Gëzim Bajrami është njëri tifozët më të ‘zjarrtë’ nga tifo-grupi dhe tashmë ka treguar se gjithçka është gati për spektaklin e madh.
“Padyshim që kjo ngjarje do të jetë diçka më e mirë dhe më e jashtëzakonshme, por për organizim dhe udhëtimet e tifozëve nuk e kemi problem, sepse ne Kombëtaren e kemi mbështetur me rezultat e pa rezultat, pavarësisht se qysh kanë shku gjërat, ne e kemi treguar veten tash e sa vite. Edhe kësaj here ne do të jemi mirë të organizuar, kemi bo organizime në çdo qytet që kemi lojë. E vështirë nuk ka qenë shumë, sepse ne kemi anëtarë gjithandej, në këtë rast Gjermania që është, ne kemi anëtarë edhe atje. Kësaj here ata kanë qenë më të angazhuar, por që padyshim edhe ne nga këtu i kemi nda punët tona që i kemi, pra jemi gati, jemi mirë shumë në këtë drejtim”, tha fillimisht ai.
Bajrami tregoi se të gjitha mesazhet që do të shpalosen në ndeshje janë gati, por që natyrisht do të jetë më interesant kur do të kenë përball tifozët nga Spanja, Italia dhe Kroacia.
“Ne si ‘Tifoza Kuq e Zi’ mesazhet tona edhe ato qëllimet që i kemi jemi mundu me i ndjek në atë rrugë. Pavarësisht se ku jemi, në Tiranë, Dortmund apo në një qytet tjetër, ne mesazhet tona jemi mundu me i dhanë dhe me i shfaq. Për në Dortmund dhe qytetet tjera, koreografitë dhe mesazhet janë gati, normalisht që është më interesant dhe më sfiduese përball Spanjës, Italisë apo Kroacisë, duke e ditur se çfarë tifozësh kanë, por prapë se prapë, mesazhet tona, koreografitë dhe organizimin tonë e kemi bërë në bazë të planit se si e kemi. Nuk ka qenë diçka e vështirë, kuptohet që ka pak më shumë rëndësi, idetë e mesazheve dhe koreografia do të jetë pak më ndryshe, por që nuk kemi pasur probleme, i kemi parashikuar të gjitha mënyrat se çfarë mund të ndodhë aty dhe me çfarë probleme mund të ballafaqohemi. Ka shumë që vijnë pa bileta”, përfundoi Bajrami.
