FSHF ka publikuar listën me lojtarët e ftuar nga trajneri Sylvinho për dy ndeshjet me Moldavinë dhe Ishujt Faroe, më 17 dhe 20 nëntor.
Ashtu si në tetor, Sylvinho nuk ka bërë ndryshime teksa u beson emrave të cilët shkëlqyen në këtë rrugëtim. Porta mbetet e njëjta me Berishën, Strakoshën dhe Kastratin ndërsa në mbrojtje rikthehet Ivan Balliu i cili ka lënë pas dëmtimin.
Mesfusha mbetet e njëjta me Baren që tani vjen në formën optimale fizike dhe do të jetë i gatshëm të japë kontributin e tij, ashtu si Gjasula dhe Laçi. Reparti i sulmit kishte dilemën e vetme dhe më të madhen për brazilianin që nga emërimi i tij në krye të pankinës kuqezi.
Armando Broja, Marvin Çuni apo asnjëri, kjo ishte ajo që ka mbajtur ‘zgjuar’ natën selektorin e Shqipërisë. Por, s’ka më dyshime dhe Sylvinho ka vendosur që të ftojë Arbnor Muçollin në vend të tyre duke befasuar të gjithë.
