Tifozat Kuq e Zi janë padyshim ‘Ushtarët e Kombit’. Gjithmonë kanë qenë pranë Kombëtares, që nga viti 2003 kur u themeluan. Në ditët e vështira dhe të mira të ekipit kombëtar, TKZ është gjendur pranë, për ta përkrahur, pasi qëllimi kryesor është BASHKIMI KOMBËTAR.
Por ky muaj shënon diçka shumë të veçantë për këtë tifogrup. Tifozat Kuq e Zi festojnë këtë muaj 20 vjetorin e themelimit. Para 20 vitesh një grup i vogël, ndërsa sot të shpëndarë në të gjitha trevat shqiptare. Pikërisht për këtë muaj të veçantë, TKZ njofton të gjithë për një festë madhështore që do të bëhet në kuadër të 20 vjetorit. Është vetë tifogrupi që e ka njoftuar diçka të tillë me anë të një postimi në faqen zyrtare, ku shkruan:
“20 vite më parë ishim pak, por ishim domosdoshmëri. Lindëm nga bashkimi i një grushti të vogël njerëzish. Me dëshirën që kombëtarja jonë mos të ishte kurrë vetëm. Falë kësaj dëshire u themeluan Tifozat Kuq e Zi. Sot jemi shumë dhe madje me këtë emërtim identifikohen të gjithë tifozët shqiptar, veshur me ngjyrat kuqezi.
Ky muaj është i shenjtë për ne, ashtu si nëntori ynë. Këtë muaj festojmë 20 vjetorin me premtimin se i njëjti pasion, dëshirë dhe “detyrim” do të na mbaj në tribunë për të qënë krahë për krahë kombëtares. Ashtu si në këtë vit të 20 vjetorit kur ja dolëm të kthehemi në një Europian.
Do të jemi edhe aty. Do të jemi edhe pas Europianit. Do të jemi në të mirë e në të keq. Do të jemi gjithmonë me dashurinë e pafundme tonën, të kuqe dhe të zezë.
Në fundin e këtij muaji do të organizojmë festën tonë të 20 vjetorit të themelimit të Tifozave Kuq e Zi. Prandaj ju ftojmë të na bashkoheni në këtë moment historik.
Për njoftimet e mëvonshme, detajet e festës dhe aktivitetet do të lajmëroheni në vazhdimësi.
Tifozat Kuq e Zi!
O sa mirë me qenë Shqiptar!”
