Kombëtarja e Zvicrës ditë më parë publikoi listën preliminare për Euro 2024.
Valon Behrami tani është analist në mediumin zviceran “20min”, ndërsa të shtunën, një ditë pasi u bë publike lista e Murat Yakinit për Kampionatin Evropian të këtij viti, ka dhënë kritika të ashpra.
“Cili është qëllimi i këtij kontingjenti”, ka thënë Behrami që ka mbetur i habitur numrin kaq të lartë të lojtarëve të ftuar.
Yakini të premten publikoi listën me 38 emra për “Euro 2024”, por ky numër do të reduktohet dy herë para se të dorëzohet lista finale për në Evropianin që organizohet në Gjermani. Gjashtë nga 38 të ftuarit e Yakinit janë me origjinë shqiptare.
“38 lojtarë. Kjo është befasi. Pse Zvicra duhet të marrë kaq numër të madh të lojtarëve në krahasim me shtetet tjera? Në kualifikime të Evropianit ka pasur kundërshtarë si Bjellorusia apo Andorra dhe lojtarët e rinj do të mund të inkuadroheshin në përfaqësuese. Pse të rinjtë po ftohen tash, pak para Kampionatit Evropian? Ka mundur që kjo të bëhej gjatë gjithë vitit, sezonit, ka pasur kohë për t’u shikuar, analizuar e testuar”, ka thënë të shtunën Behrami.
Ai ka thënë se kjo do të krijojë shumë huti sepse nuk do të mund të krijohet shpirti ekipor.
“Si mund të ndërtoni shpirtin ekipor kur gjysma prej tyre e dinë se do të largohen brenda disa ditësh? Është koha e gabuar. Fokusi tani duhet të jetë në turne, ideja taktike duhet të zhvillohen dhe të zbatohen, ndërsa ekipi duhet të funksionojë si një trup. Është koha e gabuar që disa lojtarëve të rinj t’u bëhet dhurata e të ftohen në përfaqësuese. Për çka? Edhe një herë tjetër, është e vështirë të kuptohet motivi dhe mentaliteti i vendimeve të Murat Yakinit. Por, është vendim i tij dhe kjo duhet respektuar. Shpresoj se kjo skuadër me numër kaq të madh të jap frytet e veta”, ka deklaruar Behrami.
Nati-Trainer Yakin verwirrt mit Mega-Kader: «Falscher Moment für Geschenke», findet 20-Minuten-Experte Valon Behrami. https://t.co/C9GRMGFB3n
— 20 Minuten (@20min) May 18, 2024
